閉門羹︱NFT漫畫家嘆港人難接受加密貨幣「好多人見有好成績先入場！」
兩位 NFT 足球遊戲 HolyShxxt!! 創辦人，去年畫 40 頁 NFT 漫畫賺 28 萬元 。其中林春馬（LCM）坦言，將練習放上網，至接到這個工作，前後只花了不足一年時間，「如果係香港，有幾多個做咗好多年助手都未有自己作品？」而一 RB Li 更稱：「有人成功，有好成績，先至入場，但 sorry，已經太遲。」
RB 本身從事設計，數年前已開始接觸 NFT，他認為所有插畫師都需了解加密貨幣市場，「但係香港本身好難接受到加密貨幣，何況係 NFT」。他曾多次向朋友介紹數碼資產，但接收最多的回應就是「係唔係騙案」、「可唔可以變返做現金？」
慨嘆香港藝術行業行頭窄
RB 坦言，現時不少作品都容易被盜，「但 NFT 你上載咗就冇得改，證明到邊一個先係原先嘅創作者，比現實世界更加有保障。」他續指，每個插畫師都想自己的作品有更加多人認識，「香港市場始終都好細，緊係想全世界嘅人」。他亦指香港藝術行業行頭窄，不少人都沒有作品參展的機會，「來來去去都係嗰班人，就算出到名，抽佣都好嚴重，行內最基本係抽 60%。」
「香港設計師壓榨得好勁」
經驗較多的 RB 現時經營 IG 網店，以售賣印刷藝術品為主，現時在香港的餐廳都可以看到他的作品；他亦曾經參與電單車 logo 設計比賽，「贏咗可以拎到一枚以太幣，再加兩個 NFT」，他僅用半小時就設計好作品參賽，「最後真係贏咗，比咗個以太幣我」。「對比係喺香港，你幫手設計 logo，至會壓榨得好勁，二百蚊都夠膽死。」他續指「只要你肯搵，依啲機會一定係多。」
LCM 指，區塊鏈其中一個好處，就是對抗現實世界中一些固有的職場文化，「每一個行業都俾一啲掌握住權力嘅人控制，區塊鏈係好直接，放咗啲嘢上去，唔需要經第三者就可以搵到知音人。」 機會自然比現實世界多，「最大分別係唔使再等，係可以主動出擊。」
籲同行要主動爭取機會
LCM 補充，過去設計行業一直是「搵份工，或者搵師傅，有可能得到機會，但依家要靠自己爭取，分析自己嘅潛在客戶到底係邊個。」
問到虛擬貨幣價格一向較為波動，又如果計算收入？二人皆坦言至今仍未將以太幣兌換成港元，「諗住係區塊鏈上做買賣，相信依樣嘢將來喺生活上佔好大比重，就會依家開始儲定。」RB 補充，「我哋信以太幣係可以升到去過萬美元，所以依家二千幾蚊，我哋係唔會理。」
「好多港人見有人有好成績先至入場」
問到有什麼建議可給予欲入行的插畫師，二人坦言由於 NFT 發展迅速，以個人身份參與市場已不吃香，「藝術市場開始飽和，同埋依家風氣由藝術轉至炒賣，」他亦補充市場現時重視項目是否會「爆紅」，多於插畫師的畫功，「佈家插畫師可能就要加入團隊，做一個系列好過做個體戶。」
RB 亦補充，普遍香港人心態都是「有人成功，有好成績，先至入場，但 sorry，已經太遲。」LCM 稱，因當時見到 NFT 的潛力，亦願意花數千元開啟錢包，「所以之後先可以同人做到買賣。」他亦坦言，過去不少不相信 NFT 的朋友，見原來可以成功賺錢後又「揼心口」，「首先要相倘信依樣嘢，如果都唔相信嘅，唔可以成日話無機會，因為佢哋對機會都唔渴求。」
