金句連連︱拒與「割韭菜」NFT項目合作 GoGoChart：大眾都唔係傻
今年 NFT 成大眾焦點，一眾名人爭相發行，但不足數月市場上不少 NFT 價格暴跌，「出頭像 Cap 水」等指責比比皆是。專為加密資產提供營銷推廣服務的 GoGoChart 創辦人魯曉聚直言，不少公司只講錢，「無 care 過社群」，市場經歷太多「割韭菜」項目，現時拒為疑推出割韭菜項目的公司接洽，反而建議客戶免費派發 NFT，以反映公司對項目長遠發展有信心，及對社群的關注。
有公司「 以為畀錢PR做嘢就可以」
GoGoChart 創辦人兼行政總裁魯曉聚向 fintalk180 透露，旗下專門負責 Web3.0 業務的 Titans Block，過去兩年合作公司達雙位數，夥伴包括上市公司帝國科技集團（776）、The Sandbox 等。他發現不少公司「乜都係講錢先，完全無 care 過社群」，又舉例有客曾要求推出 5,000 個 NFT，「想出完一次又出，以為畀錢 PR 做嘢就可以。」
他重申，現時加密貨幣處於熊市，如遇上企圖「割韭菜」的公司，「傾都未必傾！」另一方面公司已物色部份有潛質發展 Web3.0 的公司想合作。魯明言，企業要靠Web3.0 宣傳，建立社群是不可忽略的一環，但不少公司認為只要開設 Discord、Telegram 等就可有收入，他直言：「user 都唔係傻架嘛 。 」
他以下載應用程式為例，現時用戶下載新的應用程式意欲越來越低，「用戶會問點解要下載，部分 App 用咗咁多年，大家已經習慣咗。」而 Web3.0 都一樣，「咁多次割韭菜，突然間又話有個新項目，大眾都唔係咁傻！」
建議客戶免費派發NFT
現時 Titans Block 會建議客戶免費派發 NFT，魯曉聚解釋，如持有者不急於出售，項目又成功的話，價格自然有上升空間。免費派發亦反映公司對項目長遠發展有信心，以及對社群的關注。
他續指，在社群需交代清楚用戶「到底買依隻 NFT、依隻幣係為咗乜」，認為教育及溝通都十分重要，如初出道新人要培養支持者一樣。問及要發展 NFT 需要有什麼條件，他表示：「要對 Web3.0 有一個信念，當然都要有相關知識。」而有無投資者支持都很重要，品牌知名度較高，當然更有優勢。
外間不少人認為「NFT 只係一張圖」，問到如何改變大眾看法，魯曉聚認為，「最緊要從客戶角度出發，有冇同佢哋互動，你自己有冇親力親為，有冇同其他人合作」。他直言不少公司認為推出 NFT 後，就可以輕鬆賺數百萬，但「熊市令大家知道，要賺錢真係要做好多嘢。」
過去兩年市場經歷多次黑天鵝事件後，加上現時投資處於冰河時期，「喺咁大嘅落差之中，我哋要去學習改變。」認為不少企業都不懂如何改變，甚至是不願意改變，「如果（疫情）去到第五波，仲唔好改變，瀨硬嘢。」
他慨嘆現時不少港人「等運到」，「等政府做嘢、等資助、等開關」，「做咩都等嘅話，係冇辦法突破。」現時港企處於叫苦連天的年代，「但有公司到今時今日都係唔願意接受 Online」，「我覺得熊市先有機會，唔通等牛市嗰時先再去爭？」
GoGoChart 為數碼港初創社群成員之一，今年初獲得「德勤香港高科技高成長 10 強」，魯曉聚指，除了財政上的支持，初創可透過數碼港協助與投資者接洽、爭取傳媒曝光機會等，「係一個陪住初創公司成長嘅平台。」
